Reykjanesbær semur við Securitas

Skrifað var undir samning á milli Reykjanesbæjar og Securitas í síðustu viku. Samningurinn er um vöktun, úttektir, prófanir og farandgæslu fyrir Reykjanesbæ, Tjarnargötu 12 ehf., Fasteignir Reykjanesbæjar ehf. og Útlending ehf. Gengið var til samninga eftir sameiginlegt örútboð fyrrgreindra aðila.

Frá því er greint á vef Reykjanesbæjar að ákveðið hafi verið að efna til sameiginlegs örútboðs á öryggisþjónustu þar sem samningar voru að renna út. Markmið örútboðsins var að semja bara við einn aðila í stað tveggja líkt og áður var, enda nokkuð óhagræði í því. Báðir þjónustuaðilar buðu í og voru bæði tilboðin undir kostnaðaráætlun. Samið var við Securitas, sem átti lægra tilboðið og er ávinningur samnings 2,4 milljónir á þeim þremur árum sem samningstíminn er. Heimilt er að framlengja samning tvisvar sinnum um eitt ár í senn.