Reykjanesbær hlaut viðurkenningu Jafnvægisvogarinnar

Reykjanesbær hlaut á dögunum viðurkenningu Jafnvægisvogarinnar, hreyfiaflsverkefnis Félags kvenna í atvinnulífinu, fyrir árangur í jafnréttismálum.

Viðurkenningarhátíðin fór fram í Háskóla Íslands undir yfirskriftinni „Jafnrétti er ákvörðun“. Þar voru fyrirtæki, stofnanir og sveitarfélög heiðruð fyrir að hafa náð markmiði verkefnisins um jöfn kynjahlutföll í framkvæmdastjórn eða efsta lagi stjórnunar.

Alls hlutu 128 þátttakendur viðurkenningu að þessu sinni, þar af 90 fyrirtæki, 22 opinberir aðilar og 16 sveitarfélög. Reykjanesbær var þar á meðal og er það viðurkenning á markvissu starfi bæjarins að stuðla að jafnrétti og fjölbreytileika í stjórnunarhlutverkum.

Markmið Jafnvægisvogarinnar er að tryggja 40/60 kynjahlutfall í æðstu stjórnunarstöðum. Viðurkenningin endurspeglar árangur Reykjanesbæjar í þeim efnum og þá stefnu sem bæjarfélagið hefur markað í jafnréttismálum á undanförnum árum.