Reykjanes Iceland Geopark
Sveitarfélögin Garður, Grindavíkurbær, Reykjanesbær, Sandgerðisbær og Sveitarfélagið Vogar hafa skrifað undir samkomulag um stofnun jarðvangs á Reykjanesi.
Undirbúningsnefnd um jarðvanginn mun hefja umsóknarferli til European Geoparks Network og ráðinn verður verkefnastjóri. Aðilum í ferðaþjónustu og vísindastarfi verður einnig boðin aðild að samstarfsnefndinni og munu sveitarfélögin leggja fram fjármagn í verkefnið árin 2012 og 2013. Jafnframt hefur fengist fjármagn í verkefnið frá Alþingi í gegnum Sóknaráætlun landshluta.
Bundnar eru vonir við að árangur verkefnisins skil sér í aukningu ferðafólks á svæðinu, eflingu vísindarannsókna, meiri samvinnu og uppbyggingu í ferðaþjónustu og dýpri og aukinni þekkingu á viðfangsefninu jarðvangur.
Vegna legu sinnar og áhugaverðra jarðsögu- og menningarminja er Reykjanes tilvalið svæði fyrir jarðvang. Víðtæk áhrif jarðhræringa eru áþreifanleg um nánast allt Reykjanesið með einum eða öðrum hætti. Jarðvangur myndi sýna á fjölbreyttan hátt samspil náttúru og menningar að fornu og nýju og jarðmyndanir með sérstöðu á heimsvísu. Áhersla er lögð á að nýta þá sérstöðu til áframhaldandi þróunar og uppbyggingar á Suðurnesjum.
Mynd: f.h. Ásgeir Eiríksson bæjarstjóri Voga, Róbert Ragnarsson bæjarstjóri Grindavíkur, Ásmundur Friðriksson bæjarstjóri sveitarfélagsins Garðs og Árni Sigfússon bæjarstjóri Reykjanesbæjar.
