Rekstur bygginga kostar 71 milljón á ári

Ríkið greiðir fyrir rekstur 58 bygginga á öryggissvæðinu á Keflavíkurflugvelli. Samtals eru þessar byggingar tæpir 52.000 m2. Byggingarnar eru flestar í einhverri notkun ef frá eru taldar sex byggingar sem hafa verið aftengdar frá hita- og rafveitum og verða að öllum líkindum rifnar. Þetta kemur fram í svari utanríkisráðherra við fyrirspurn Silja Daggar Gunnarsdóttur alþingismanns um byggingar á öryggissvæðinu á Keflavíkurflugvelli.

 

Margar byggingar eru aðeins tengdar við rafveitu og því óverulegur kostnaður tengdur rekstri þeirra. Vannýtt rými er í dag metið um 12.560 m2 og er þá fyrst og fremst um að ræða rými í byggingum sem eru að hluta í fullri notkun en hægt væri að nýta betur.

 

Áætlaður rekstrarkostnaður 2014 fyrir þær 58 byggingar sem hér um ræðir er 70.984.427 kr. Ekki liggja fyrir nákvæmar kostnaðartölur vegna rýmis sem ekki er að fullu nýtt.

 

Af þeim byggingum sem eru á öryggissvæðinu eru 16 í umsjón Isavia, eitt flugskýli er leigt til Flugskóla Keilis, eitt vöruhús er í umsjón embættis ríkislögreglustjóra og hefur Slysavarnafélagið Landsbjörg einnig afnot af einu vöruhúsinu. Olíudreifing ehf. er með olíubirgðastöðvarnar og tengd kerfi á leigu. Framangreindir aðilar eru ábyrgir fyrir allri notkun, rekstri og viðhaldi.

 

Rafkerfi breytt fyrir 585 milljónir króna

 

Búið er að breyta rafkerfum í 20 byggingum á öryggissvæðinu. Í desember 2013 hófst vinna við að breyta rafkerfum í stjórnstöð Atlantshafsbandalagsins á Keflavíkurflugvelli og er síðan ráðgert að flugskýli 831 verði að hluta til breytt síðar á árinu. Almennt gildir að umfang breytinga miðast við notkun bygginga eins og hún er í dag.

 

Á vestursvæðinu verður 31 byggingu ekki breytt fyrir en eftir 2017, þ.e. þær hafa verið tengdar við bráðabirgðadreifikerfi sem rekið er í samvinnu við Isavia. Ekki er á dagskrá að breyta rafkerfum í fimm til sex byggingum á öryggissvæðinu þar sem ekki er sjáanleg framtíðarnotkun eða ástand þeirra með þeim hætti að til stendur að rífa þær. Leigutakar eru ábyrgir fyrir rafkerfisbreytingum í þeim byggingum sem þeir hafa til umráða.

 

Áætlaður heildarkostnaður við rafkerfisbreytingar á mannvirkjum á öryggissvæðinu, þ.e. þær breytingar sem lokið verður við fyrir árslok 2014, er 585 millj. kr., þar af er búið að framkvæma fyrir um 339 millj. kr. Verkefnið er fjármagnað með framlögum úr sjóðum Atlantshafsbandalagsins og framlögum sem Ratsjárstofnun hafði til viðhalds á mannvirkjum bandalagsins.