Reiður leigutaki myndsnældu vildi ekki borga sektina

Skömmu eftir miðnætti á uppstigningardag var lögreglan kvödd að myndbandaleigu í Keflavík. Þar hafði leigutaki myndsnældu reiðst þegar leigusalinn ætlaði að innheimta vanskilagjald. Leigutakinn rauk á dyr og skellti hellst til og fast á eftir sér þannig að rúður í hurð leigunnar brotnuðu. Þetta og margt annað í dagbók lögreglunnar í Keflavík:Mánudagurinn 26. maí 2003.
Kl. 08:21 var tilkynnt um rúðubrot í vinnuskúrum við nýbyggingu á Framnesvegi í Keflavík. Búið var að brjóta fimm rúður í tveimur skúrum.
Kl. 11:50 var tilkynnt um eignaspjöll á tjaldi utan við Íshússtíg 12 í Keflavík. Búið var setja nokkrar rifur á tjaldið.
Kl. 13:48 var tilkynnt um harðan árekstur tveggja fólksbifreiða á gatnamótum Reykjanesbrautar og Grindavíkurvegar. Ökumaður annarrar bifreiðarinnar var fluttur á sjúkrahús í Reykjavík til aðhlynningar. Hann var lagður inn til eftirlits en er ekki talinn alvarlega slasaður. Farþegi í hinni bifreiðinni, ófrísk kona, var fluttur á Heilbrigðisstofnun Suðurnesja til eftirlits en fékk að fara heim að skoðun lokinni. Báðar bifreiðarnar voru fjarlægðar af vettvangi með dráttarbifreið.
Kl. 14:47 var mjög ölvaður og æstur maður færður í fangahús vegna heimilisófriðar í heimahúsi í Keflavík. Einn lögreglumaður slasaðist lítillega við handtökuna á manninum.
Kl. 18:47 var ökumaður kærður fyrir að aka á 142 km á Garðvegi þar sem hámarkshraði er 90km. Hratt virðist vera ekið á Garðvegi og mun lögreglan gefa því sérstakar gætur á næstunni. Ökumenn eru beðnir um að virða hámarkhraða.
Á dagvaktinni voru 6 ökumenn kærðir fyrir að nota ekki öryggisbelti. Einn ökumaður var kærður fyrir hraðakstur á Reykjanesbraut. Mældur hraði 120 km þar sem hámarkshraði er 90 km.
Kl. 22:25 var tilkynnt um reyk frá Eldborg, húsi Hitaveitu Suðurnesja í Svartsengi. Hafði glussi af dælu fyrir lyftu í sýningarsalinn sprautast út í loftið. Var glussinn sjóðandi heitur og mátti litlu muna að kviknaði í. Sprautaðist glussinn á gólfið.
Þriðjudagurinn 27. maí 2003.
Kl. 10:00 fóru lögreglumenn í Grunnskóla Grindavíkur og voru viðstaddir er Grindavíkurdeild Rauða krossins gaf öllum börnum í 1. bekk, samtals 45 börn, reiðhjólahjálma. Gott framtak hjá Rauða krossinum.
Notkun reiðhjólahjálma hefur aukist talsvert undanfarið en ennþá vantar talsvert upp á það. Sérstaklega vantar upp á að börn 12 ára og eldri noti hjálma.
Kl. 10:23 var tilkynnt um eignaspjöll á bifreið utan við Heiðarholt 34 í Keflavík
Kl. 11:40 var tilkynnt um rúðubrot í hesthúsi sem er við íbúðarhúsnæði á Njarðvíkurbraut í Innri-Njarðvík. Þrjár rúður voru brotnar.
Kl. 12:47 var tilkynnt um minniháttar umferðaróhapp á bifreiðastæði við Aðalstöðina í Keflavík.
Á dagvaktinni voru 6 ökumenn kærðir fyrir að vera ekki með öryggisbeltið spennt við aksturinn.
Miðvikudagurinn 28. maí 2003.
Einn ökumaður var kærður fyrir að nota ekki öryggisbelti.
Skráningarnúmer voru tekin af tveimur bifreiðum. Af annarri vegna vanrækslu á vátryggingarskyldu og af hinni þar sem ekki hafði verið sinnt boðun lögreglu um að mæta með hana til skoðunar.
Á dagvaktinni voru 9 ökumenn bifreiða kærðir fyrir að nota ekki bílbelti við aksturinn, einni einn farþegi í bifreið. Þá voru 3 ökumenn kærðir fyrir að hafa ekki ökuskírteinið meðferðis við aksturinn. Tveir ökumenn voru kærðir fyrir of hraðan akstur bifreiða og ók sá er hraðar ók á 122 km hraða, þar sem hámarkshraði er 90 km. Einn ökumaður var kærður fyrir að nota ekki handfrjálsan búnað er hann ók bifreið sinni og talaði í farsíma.
Kl. 23:16 var maður ölvaður handtekinn við Heiðarskóla í Keflavík í Reykjanesbæ en hann hafði verið til ama og óæðis á staðnum. Hann var látinn sofa úr sér áfengisvímuna hjá lögreglunni.
Kl. 23:54 var lögregla og sjúkralið kvatt að Mánagrund í Keflavík en þar hafði kona á fertugsaldri fallið af hestbaki og kenndi til í baki. Hún var flutt með sjúkrabifreið til sjúkrahúss.
Lögreglan í Keflavík kærði þrjá ökumenn fyrir hraðakstur í umdæminu á tímabilinu frá kl. 19:00 til 07:00.
Lögreglan í Keflavík kærði tíu umráðamenn ökutækja í umdæminu á tímabilinu frá kl. 19:00 til 07:00 fyrir að færa ökutækin ekki til lögboðinnar skoðunar á tilsettum tíma.
Fimmtudagurinn 29. maí 2003. (Uppstigningardagur.)
Lögreglan í Keflavík kærði einn ökumann fyrir hraðakstur í umdæminu á tímabilinu frá kl. 19:00 til 07:00.
Kl. 00:20 var lögreglan kvödd að myndbandaleigu í Keflavík. Þar hafði leigutaki myndsnældu reiðst þegar leigusalinn ætlaði að innheimta vanskilagjald. Leigutakinn rauk á dyr og skellti hellst til og fast á eftir sér þannig að rúður í hurð leigunnar brotnuðu.
Kl. 01:19 var lögregla og slökkvilið kvatt til Garðs en þar í bæ var eldur laus í bílskúr. Greiðlega gekk að slökkva eldinn en miklar skemmdir urðu á skúrnum. Eldsupptök eru ókunn.