Ráku kórinn, organistann og meðhjálparann

Mikil óeining er uppi á milli sóknarnefnda Ytri- og Innri- Njarðvíkurkirkna. Rak sóknarnefnd Ytri-Njarðvíkurkirkju kórinn, organistann og meðhjálparann í kjölfar bréfaskrifta nýrrar sóknarnefndar Innri-Njarðvíkurkirkju. Frá þessu er greint á visir.is í dag.Meðhjálparinn hefur þó verið endurráðinn, en algjört samstarfsslit virðist vera á milli sóknarnefndanna. Þá er einnig svo komið, samkvæmt upplýsingum DV, að félagar sameiginlegs kirkjukórs safnaðanna sem stofnaður var fyrir 6 árum og séra Baldur Rafn Sigurðsson sóknarprestur talast vart við í messum.

Séra Þorvaldur Karl Helgason, núverandi biskupsritari, lét af starfi sóknarprests Njarðvíkinga í mars 1992 er sr. Baldur tók við embættinu. Í samtali við DV sagðist sr. Þorvaldur hafa heyrt af einhverjum vanda þar suðurfrá. Hann hafi þó engin afskipti hafa haft þar af málum síðan hann hætti, enda hafi formlegt erindi ekki borist um málið til Biskupsstofu.

Séra Baldur Rafns Sigurðsson, sóknarprestur Njarðvíkinga, sagði í samtali við DV í gær að í sumar hafi komið ný sóknarnefnd í Innri-Njarðvík. Með henni hafi verið teknar upp nýjar áherslur. "Söfnuðirnir eru sjálfstæðir og hafa sinn ákvörðunarrétt," sagði séra Baldur og kvaðst halda sig utan við samskiptavanda sem kom þar upp í sumar.

"Ég skipti mér ekkert af þessu og er prestur í báðum söfnuðunum." Hann þvertók fyrir að samskiptavandamál væru á milli sín og kórfélaga. "Ég hef messað í Innri-Njarðvík og kórinn syngur þar. Svo er verið að ganga frá ráðningu nýs fólks í Ytri-Njarðvík," sagði séra Baldur.

Stjórn Ytri-Njarðvíkursóknar hefur um árabil séð um fjárreiður og greiðslur vegna sóknarstarfsins í Innri- Njarðvíkursókn. Þótti æði viðamikið fyrir gjaldkerann í Ytri-Njarðvík að sjá um þetta fyrir nágrannasóknina endurgjaldslaust. Í sumar var skipt um alla sóknarnefnd í Innri-Njarðvíkursókn. Var þá ákveðið að létta byrðinni af gjaldkeranum í Ytri-Njarðvík og gjaldkeri Innri-Njarðvíkursóknar tæki við allri fjárumsýslu þeirrar kirkju.

Þann 31. júlí sendi sóknarnefndin nýja sr. Baldri bréf, þar sem tilkynnt var að hætt yrði greiðslum á bílastyrk til prestsins; "fyrir ótilteknar og óumbeðnar ferðir í þágu safnaðameðlima," eins og segir orðrétt í bréfinu. Taldi sóknarnefnd einungis skylt að greiða útlagðan kostnaði af ferðum sem sóknarnefnd óskaði sérstaklega eftir.

Sama dag ritaði Erlingur J. Leifsson gjaldkeri kollega sínum Nínu Magnúsdóttur, gjaldkera Ytri-Njarðvíkursóknar, bréf. Þar segir að Innri-Njarvíkursókn sjái framvegis um fjármál sín. Þá fer Erlingur þess á leit að Nína afhendi honum öll gögn sem tilheyra Innri-Njarðvíkursókn. Sóknarnefndarformaður Ytri -Njarðvíkurkirkju, Leifur A. Ísaksson, sendi 3. ágúst Jóni A. Brynjólfssyni, formanni Innri-Njarðvíkursóknar, svar við þessum bréfaskriftum.

Þar kom fram að á fundi sóknarnefndar Ytri-Njarðvíkursóknar 2. ágúst hafi verið fjallað um samrekstrarslitin. Harmar sóknarnefndin ákvörðun sóknarnefndar Innri-Njarðvíkursóknar. Síðan er lýst mjög harkalegum viðbrögðum við þessum samskiptaslitum

Þessi ákvörðun sóknarnefndar Innri-Njarðvíkursóknar mun valda því að segja þarf upp ráðningasamningum við Steinar Guðmundsson organista og Þórir Jónsson, meðhjálpara og kirkjuvörð. Þá er einsýnt að leggja þarf niður sameiginlegan kirkjukór safnaðanna."

Síðan segir að af þessum sökum samþykki sóknarnefnd að segja upp hlutdeild Ytri-Njarðvíkursóknar í ráðningarsamningi við Steinar organista og Þóri, meðhjálpara og kirkjuvörð, frá og með 1. september með þriggja mánaða uppsagnarfresti. Samþykkir sóknarnefndin líka að standa fyrir stofnun kirkjukórs við Ytri-Njarðvíkurkirkju frá og með 1. desember 2001. Þá er samþykkt að auglýsa 60% stöðu organista og 70% stöðu meðhjálpara og kirkjuvarðar.

Sóknarnefnd Innri-Njarðvíkursóknar svaraði bréflega 8. ágúst vegna þessara hörðu viðbragða og segir um misskilning að ræða. Ástæða samrekstrarslita hafi verið kvartanir endurskoðanda kirkjunnar sem ekki gat gert upp reikninga kirkjunnar þar sem hann fékk ekki aðgang að upplýsingum frá Ytri-Njarðvíkursókn. Í bréfinu óskaði sóknarnefndin síðan eftir fundi 13. ágúst.

Sóknarnefnd Ytri-Njarðvíkursóknar svaraði bréflega 10. ágúst og sagðist þar ekki sjá neina ástæðu til að funda frekar um málið. Að sögn sóknarprests sótti meðhjálparinn um að nýju hjá Ytri-Njarðvíkurkirkju og hefur verið gengið frá endurráðningu hans. Málefni organista er í skoðun. Ekki náðist í prófast Suðurnesjamanna, Gunnar Kristinsson á Reynivöllum, en hann mun vera erlendis.

Frétt af Vísir.is.