Rafretta kveikti í handfarangri í flugi frá Keflavík
Áhöfn flugvélar Wizz Air frá Keflavík til Wroclaw í september á síðasta ári slökkti í rafrettu sem kviknað hafði í með vatni. Þetta kemur fram í skýrslu rannsóknarnefndar samgönguslysa, en greint er frá málinu á mbl.is.
Í skýrslu rannsóknarnefndarinnar kemur fram að í ljós kom að takki rafrettunnar hafði fest inni í hliðarhólfi bakpoka sem geymdur var í farangurshólfi fyrir ofan sætaraðir flugvélarinnar.
Við veitingasölu tók einn í áhöfninni eftir reyk sem barst úr farangurshólfinu. Annar hljóp til og náði í slökkvitæki og sá þriðji gerði öðrum flugliðum viðvart. Farþegi opnaði á meðan farangurshólfið og kom bakpokanum fyrir á gólfi vélarinnar. Áhöfnin fylgdi því næst starfsreglum og reyndi að hella vatni á rettuna, en nokkrum sinnum blossaði upp eldur í rafrettunni áður en endanlega tókst að slökkva í henni.
Flugmenn vélarinnar lýstu fyrir neyðarástandi og tókst áhöfninni að lokum að koma rafrettunni fyrir í rusli undir vaski á salerni vélarinnar, en það er úr málmi og búið slökkvikerfi ef þar skyldi kvikna eldur. Frekara slökkvistarf þurfti ekki og var flugvélinni síðan lent í Keflavík.
