Rafmagnsleysi kostaði HS fjórar milljónir króna

Útsláttur Suðurnesjalínu sem varð  þann 29. febrúar í flutningskerfi Landsnets hf vegna eldingar og olli rafmagnsleysi á Suðurnesjum beinum kostnaði HS hf að upphæð um 4 M.kr.  auk tapaðrar orkusölu og þarf HS hf alfarið að bera þennan kostnað.  Virkjanir HS hf í Svartsengi og á Reykjanesi slógu út um kl. 11.15 og þurfti HS hf að kaupa þá raforku, sem ella hefði verið framleidd í virkjununum, frá netinu til að geta staðið við orkuafhendingu til þeirra viðskiptavina sinna sem ekki misstu rafmagn meðan verið var að koma virkjunum aftur í fullan rekstur. Þá er ótalið tjón fyrirtækja og einstaklinga vegna svona útsláttar þar sem öll vinna legst niður og eitthvað var um að tíðniflökt ylli tjóni hjá einstaklingum á sjónvörpum o.fl. Þetta kemur fram í tilkynningu frá Hitaveitu Suðurnesja hf.

Það sem gerist þegar línan fer út er að virkjanir HS hf með framleiðslu á bilinu 150 og 160 MW koma ekki frá sér nema notkuninni á Suðurnesjum sem er á bilinu 20 – 30 MW eftir aðstæðum. Við það fellur tíðnin og virkjanirnar detta út. Eins og staðan er í dag þá sitja Suðurnesjamenn ekki við sama borð og allflestir raforkukaupendur landsins þegar kemur að öryggi raforkuflutnings.  Orkuframleiðsla HS hf á Suðurnesjum er orðin stærsta framleiðslueining raforkukerfisins sem tengd er með einni línu og stefnir í að verða einu stóru virkjanirnar sem tengdar eru kerfinu með þeim hætti.  Við það að raforkukerfi landsins missi út þessa framleiðslu þarf að grípa til skerðingar raforku á suðvesturhorninu og getur það ekki talist ásættanlegt ástand.

Raforkunotendur á Suðurnesjum greiða sama verð fyrir flutning raforku og aðrir raforkukaupendur í landinu. Það sama á við raforkuframleiðslu HS hf, hún  greiðir sama verð fyrir flutning frá Suðurnesjum og aðrir raforkuframleiðendur í landinu, þótt öryggi afhendingar sé almennt minna. Það má segja að það sé undarlegt að allur kostnaður við slíkar bilanir leggist alfarið á HS hf og eðlilegt að flutningsgjöld væru lægri meðan þetta ástand varir.

Það hefur verið krafa HS hf um nokkurt skeið að ráðist verði í byggingu nýrrar flutningslínu frá Hamranesi í Hafnarfirði til Suðurnesja og hefur Landsnet hf tekið þeirri málaleitan vel. Er sú vinna í gangi og vonandi kemur til þeirra framkvæmda sem fyrst þannig að afhendingaröryggi fyrirtækja, almennings og orkuframleiðslunnar verði með viðunandi hætti.