Rafgeymasöfnunin gekk framar vonum

Um 13 tonn söfnuðust af af rafgeymum í síðustu viku en þá stóð yfir sérstakt átaksverkefni á vegum Kölku, Bláa hersins og sveitarfélaganna. Eru forsvarsmenn átaksins mjög ánægðir með árangurinn en þetta magn er 25% af því heildarmagni sem Kalka flutti af rafgeymum til förgunar allt síðastliðið ár.

Að sögn Tómasar Knútssonar hjá Bláa hernum, var ekki vanþörf á átakinu þar sem mikið hafði verið um rafgeyma í algeru reiðileysi út um víðan völl. Oft ráði sinnuleysi því að fólk losi sig við slíka rafgeyma með réttum hætti en bæði fyrirtæki og einstaklingar geta skilað þeim endurgjaldslaust til Kölku. Rafgeymasýran er mjög skaðleg umhverfinu og því mjög brýnt að fólk losi sig við geymana á réttan hátt.

Tómas segir að þakka megi þeim fjölmörgu sem tóku þátt í verkefninu og sýndu þannig samfélagslega ábyrgð fyrir umhverfinu. Hreinsunarátakið hafi verið öllum til sóma sem þátt tóku: einstaklingum, fyrirtækjum, forsvarsmönnum Kölku, Bláa hernum og sveitarfélögunum. Vonandi yrði áframhald á þessu á komandi árum.

Að gefnu tilefni vilja forsvarsmenn Kölku og Bláa hersins minna einstaklinga og fyrirtæki á að ávallt er hægt að skila spilliefnum inn til förgunar til Kölku, í móttökustöð eða á gámaplönin.