Ræddi uppsögn í Landsbankanum í þingsal

Ásmundur Friðriksson, þingmaður Sjálfstæðisflokks í Suðurkjördæmi, ræddi uppsögn Guðmundar Ingiberssonar hjá Landsbankanum í Reykjanesbæ í ræðu sinni á Alþingi í gær. Hann sagði framkomu yfirmanna Landsbankans ofbjóða fólki og að miskunnarleysið væri algjört.

 

Starfsmaðurinn er með fötlun og hafði starfað við bankaþjónustu í um 30 ár. Uppsögn hans vakti sterk viðbrögð og voru margir sem mótmæltu henni. Ásmundur sagðist hafa sent erindi til stjórnar bankans um það hvort ekki stæði til að gera breytingar meðal æðstu stjórnenda Landsbankans. „Þar sitja stjórn­end­ur sem eru rún­ir öllu trausti al­menn­ings og stór hluti starfs­mann­anna upp­lif­ir van­líðan við störf sín alla daga. Virðuleg­ur for­seti, ég hélt að ótta­stjórn væri liðin tíð,“ sagði Ásmundur á Alþingi í gær.

 

Þá sagði hann siðferðisbresti í íslensku samfélagi sífellt meira áberandi og nánast áþreifanlega í daglegu lífi og vísaði til sölu Landsbankans á hluta í Borgun og á sölu Arion banka á hluta í Símanum.