Ráðstefna Hjallastefnunnar í Stapa

Um helgina fer fram í Stapa ráðstefna sem ber yfirskriftina „Jafnréttisstarf í leikskólum“, en það er Hjallastefnan sem heldur ráðstefnuna. Um 200 manns eru á ráðstefnunni og er ráðstefnugestum skipt niður í nokkrar vinnustöðvar þar sem ýmis atriði Hjallastefnunnar eru rædd.
Í september árið 1989 opnaði Hafnarfjarðarbær leikskólann Hjalla í Hafnarfirði og réð til starfa leikskólastjórann Margréti Pálu Ólafsdóttur, sem þá hafði um árabil starfað sem leikskólastjóri hjá Reykjavíkurborg. Margrét Pála lagði upp með all nýstárlega námsskrá fyrir leikskólann; kynjaskiptar deildir, engin leikföng og hugsýn um að allir ættu að vera vinir og hafa sama rétt og stunda jákvæð samskipti. Á síðustu árum hefur Hjallastefnan náð mikilli útbreyðslu og eru nú 13 leikskólar á Íslandi sem nota þessa stefnu í starfi sínu.
Í bók sinni „Æfingin skapar meistarann“ segir Margrét Pála m.a.: „Allir uppalendur búa við þá þversögn að undirbúa börn fyrir framtíð sem enn er óþekkt og það er þeim ætlað að gera með uppeldi frotíðarinnar á herðunum. Þversögn - því hver tími glímir við ólík mál og þarfnast ólíkra lausna. Þau vandamál sem helst er við að etja í uppeldi í dag og Hjallastefnan tekur á eru mismunun kynjanna, spenna og streita umhverfisins svo og hegðunarvandamál sem brenna æ meira á uppalendum í dag. Allir þessir þættir eru hjallar á leið að marki hversdagsins í leikskólastarfi og reyndar víðar væri þeirra leitað. Hjallastefnan leggur til einfaldar og ákveðnar uppgönguleiðir fyrir hvern og einn hjalla enda hafa þeir allir verið skoðaðir gaumgæfilega í leit að kjarna málsins. Í stað mismununar kynjanna og starfshátta sem þrýsta öllum í sama mót felur Hjallastefnan í sér viðurkenningu á einkennum hvað varðar kynferði, aldur, getu og sérkenni hvers og eins. Í stað mötunar og aðkeyptra verkefna fyrir börn leggur Hjallastefnan áherslu á einfalt og nákvæmt umhverfi þar sem ímyndun, sköpun og skynjun barnanna er eina leirefnið. Í stað spennu og streitu sem hraði og afkastakröfur umhverfisins valda börnum sem fullorðnum, leggur Hjallastefnan til rósemi og líf í núinu. Loks tekur Hjallastefnan á hegðunarvandamálum og lítur á ögun og kennslu í framkomu sem forsendu þess frelsis sem kunnátta í umgengni veitir.“