Ráðherra vonar að sr. Skúli ávinni sér trausts

Í kjölfar skipunar sr. Skúla Ólafssonar í embætti sendu Víkurfréttir fyrirspurnir til Björns Bjarnasonar um málið sem hann svaraði um hæl.

Finnst þér rétt að skipa sr. Skúla í embætti þegar svo stór hluti sóknarbarna hefur lýst yfir ósætti sínu við ákvörðun valnefndar?
„Ég skipaði sr. Skúla sóknarprest að tillögu valnefndar og biskups. Í sókninni eru tveir prestar, annar sóknarprestur, skipaður af ráðherra eftir lögbundnum reglum. Sr. Sigfús nýtur greinilega mikils trausts meðal sóknarbarna og ég vona, að sr. Skúla takist að ávinna sér sambærilegs trausts."

Var mögulegt fyrir þig að vísa málinu aftur til sóknarnefndar?
„Ég sé ekki, að lög geri ráð fyrir þeim kosti."

Óttastu að ákvörðunin muni leiða til sundrungar innan safnaðarins?
„Ég tel víst, að sóknarbörn og prestar muni leggja sig fram um að vinna í sátt og samlyndi að iðkun trúar sinnar og kirkjustarfi. Ég hitti talsmenn þess fólks, sem andmælti ákvörðun valnefndar, og lýsti sjónarmiðum mínum. Ef lögbundin aðild mín sem ráðherra að þessari ákvörðun stuðlar að sundrungu innan safnaðarins harma ég það.
Ég er raunar þeirrar skoðunar, að skipan og lausn sóknarpresta eigi að vera á valdi kirkjunnar án afskipta ríkisvaldsins, það sé í anda hæfilegs aðskilnaðar milli ríkis og kirkju. Ég mun huga að því að leggja til við kirkjuþing, að skipunarvaldið verði tekið úr höndum ráðherra."