Ráðherra vill vinna hratt að lausn læknadeilunnar

Jón Kristjánsson heilbrigðisráðherra sagði í samtali við mbl.is í kvöld að það hafi verið jákvætt andrúmsloft á fundi stjórnar heilsugæslulækna og heilbrigðisráðherra sem lauk nú undir kvöld. Hann segist bjartsýnn á að hægt verði að ná samkomulagi við heilsugæslulækna, án þess að vilja tjá sig efnislega um það. Ráðherra sagði að ákveðið hefði verið að funda aftur með læknum síðar í vikunni.
„Heilsugæslulæknar hafa lagt fram ákveðnar hugmyndir til að leysa deiluna og við einnig. Við erum að skoða tiltekin atriði og ég legg mikið upp úr því að hratt verði unnið í málinu til að leysa þá spennitreyju sem þetta mál er komið í," sagði ráðherra.
„Ég held að það sé ekki skynsamlegt að greina frá því hvað okkur fór á milli á fundinum. Það var jákvætt andrúmsloft og við hittumst aftur síðar í vikunni. Ég er tiltölulega bjartsýnn á að við náum sameiginlegum grundvelli," sagði Jón Kristjánsson.