Ráðgjafarstofa um fjármál heimilanna og VSFK halda samstarfi áfram

Ráðgjafastofa um fjármál heimilanna og Verkalýðs- og sjómannafélag Keflavíkur og nágrennis undirrituðu á dögunum nýjan þjónustusamning þess efnis að ráðgjafar frá Ráðgjafarstofunni muni á fyrirfram ákveðnum dögum veita endurgjaldslausa ráðgjöf á skrifstofu VSFK. Ráðgjöfinni er einkum ætlað að veita einstaklingum og fjölskyldum í greiðsluerfiðleikum yfirsýn yfir stöðu fjármála sinna og leita leiða til lausnar á greiðsluerfiðleikum.

Í fréttatilkynningu frá samningsaðilum kemur fram að samstarf aðilanna hófst í maí síðastliðnum og var þá gerður samningur til áramóta til reynslu. Samkvæmt samningnum fóru ráðgjafar Ráðgjafarstofu einu sinni í mánuði á fyrirfram ákveðnum dögum til Keflavíkur og tóku viðtöl á skrifstofu VSFK á Hafnargötu 80, Keflavík.

Á þessu tímabili kom berlega í ljós að þessi aukna þjónusta við Suðurnesjamenn féll í góðan jarðveg og var þjónustan vel nýtt af íbúum sveitarfélagsins. Af þeim sökum var ákveðið að halda þessu ánægjulega samstarfi áfram og undirrita nýjan þjónustusamning milli sömu aðila.

Þeir sem telja sig hafa þörf fyrir ráðgjöf þurfa að panta ákveðinn viðtalstíma við ráðgjafa og eru bókanir þegar hafnar í síma 421-5777 á skrifstofu VSFK. Fyrsti viðtalstími ráðgjafa á árinu 2006 verður fimmtudaginn 2. febrúar nk. Þeir sem ekki komast í viðtal er boðið upp á símaviðtal sama dag og ráðgjafinn verður í Keflavík. Unnt er að nálgast umsóknir um ráðgjöf á skrifstofu VSFK og á heimasíðu Ráðgjafarstofu www.rad.is.

Eftirfarandi eru dagsetningar á komum ráðgjafa til VSFK á árinu 2006: 2. febrúar, 2. mars, 6. apríl, 4. maí, 1. júní, 6. september, 5. október, 2. nóvember, 7. desember.

Samningurinn gildir út árið 2006 og segir í fréttatilkynningunni að óskandi sé að þessi aukna þjónusta sem Verkalýðs-og sjómannafélag Keflavíkur og nágrennis er að veita einstaklingum og fjölskyldum sem eiga í greiðsluerfiðleikum á sínu starfssvæði komi íbúum sveitarfélagsins til góða eins og sannaðist á nýliðnu ári.

Á myndinni sjást fulltrúar VSFK og Ráðgjafarstofnunar heimilanna undirrita samninginn