R- og D-listi vísa frá tillögu F-lista um áframhald flugs á höfuðborgarsvæðinu

Á fundi borgarstjórnar Reykjavíkur í gær (20. september) felldu fulltrúar R- og D-lista tillögu borgarfulltrúa F-listans, Ólafs F. Magnússonar, um að tryggja áframhald innanlands-, og sjúkraflugs á höfuðborgarsvæðinu og að ekki komi til greina að flytja Reykjavíkurflugvöll til Keflavíkur. Í tillögu Ólafs var tekið undir óskir fólks hvaðanæva af landinu um að allir landsmenn eigi greiðan aðgang að stærstu sjúkrahúsum þjóðarinnar. Einnig þurfi að vera mögulegt að mynda loftbrú til og frá höfuðborgarsvæðinu vegna náttúruhamfara eða mengunarslysa.

Að mati tillöguflytjanda staðfestir frávísunin algera kúvendingu borgarstjórnarflokks Sjálfstæðisflokksins, sem fram til þessa hefur verið fylgjandi flugstarfsemi á höfuðborgarsvæðinu, en greiðir nú atkvæði gegn tillögu um að áframhald þessarar starfsemi verði tryggt. F-listinn hefur aftur á móti markað sér skýra sérstöðu í málinu, sem eina aflið í borgarstjórn, sem leggst alfarið gegn flutningi Reykjavíkurflugvallar til Keflavíkur.

Í greinargerð með tillögu Ólafs kemur fram að hringlandaháttur R- og D-lista varðandi framtíð flugsamgangna á höfuðborgarsvæðinu tefli mikilvægum öryggishagsmunum íbúa þess og annarra landsmanna í óvissu. Tillagan og greinargerðin er birt í heild á heimasíðu F-listans www.f-listinn.is.

Borgarstjóri, Steinunn Valdís Óskarsdóttir, bar upp frávísunartillögu, þar sem vísað var til atkvæðagreiðslu um flugvöllinn í Vatnsmýri árið 2001, “þegar meirihluti var fyrir því að hann flyttist þaðan”. Þá sagði borgarstjóri “ekki rétt að ýta undir ótta við almannavá eða bresti í heilbrigðisþjónustu komi til þess að flugþjónusta leggist af í Vatnsmýrinni.”

Oddviti borgarstjórnarflokks Sjálfstæðisflokksins bar af sér ásakanir Ólafs um hringlandahátt í flugvallarmálinu og að hann útilokaði ekki flutning vallarins til Keflavíkur. Ólafur svaraði því til að Vilhjálmur gæti tekið af öll tvímæli um þetta með því að greiða tillögu Ólafs atkvæði sitt. Það gerði Vilhjálmur ekki fremur en aðrir borgarfulltrúar Sjálfstæðisflokksins, sem studdu allir sem einn frávísunartillögu borgarstjóra. Frávísunartillagan var því samþykkt með 14 atkvæðum gegn atkvæði Ólafs.