Priyanka dúxaði í Keili

Priyanka Thapa varð dúx við verk- og raunvísindadeild Keilis en sumarútskrift Keilis fór fram í gær frá Andrews-leikhúsinu á Ásbrú. Þar voru útskirfaðir nemendur af Háskólabrú - verk og raunvísindadeild, atvinnuflugmannsnámi Flugakademíu Keilis og úr ÍAK íþróttaþjálfun.

Námið á háskólabrú tekur eitt ár og klára nemendur sem samsvarar um 80 framhaldsskólaeiningum á þeim tíma. Nemendur sem fara hina hefðbundnu leið í framhaldsskóla ljúka 18-20 einingum á hverri önn ætli þeir að klára á réttum tíma.

Priyanka var með meðaleinkunnina 9,03, og hefur nú þegar fengið inni í lyfjafræði við Háskóla Íslands.

Priyanka hefur verið talsvert í fréttum hér á landi. Hingað kom hún til að gæta barna í Vogum á Vatnsleysuströnd. Henni var síðan synjað um dvalarleyfi en innanríkisráðherra tók mál hennar upp að nýju og er það í dag í farvegi.


Á efstu myndinni er Priyanka með þeim Hjálmari Árnasyni framkvæmdastjóra Keilis og Árna Sigfússyni stjórnarformanni Keilis. VF-myndir: Hilmar Bragi