Prestastígurinn genginn á páskahátíð

Prestastígurinn, hin forna þjóðleið millum Grindavíkur og Hafna, var genginn í gær en þetta er hluti af gönguhátíð í Grindavíkurlandi um páskana. Ferðin var frábær í stórbrotnu landslagi og göngufólk mjög ánægt. Næsta ferð er á laugardag kl. 11, mæting á Bláalónsleið við suðvesturhornið á Þorbirni. Grindvíkingar sem og aðrir eru hvattir til að mæta og njóta leiðsagnar um náttúru og sögu svæðisins auk þess að njóta hollrar hreyfingar.

Á heimasíðu Ferlis segir um Prestastíginn:
„Augljóst þótti að gamlar vörður við götuna höfðu verið upphlaðnar á leiðinni á síðustu öld, augsýnilega sem vetrarleið, en gamla gatan, sem fetuð hafði verið alla jafnan fyrrum, reyndist augljós sjáandi til hliðar við þær. Vörðubrot á leiðinni bentu og til þess að hún væri í raun allgömul. Af fenginni reynslu hafði fengist vissa fyrir styrttri hjáleið af stígnum undir Sandfellshæð um Hafnaheiði í Hafnir.
Vikið var af stígnum við systrasprungur Eldvarpa og við ömmudyngjuna Sandfellshæð. Flekamótin voru skoðuð í Haugsvörðugjá, rifjuð upp tilefni örnefnanna Haugur og Presthóll, auk þess sem rúmlega hundrað ára saga sanduppgræðslunnar - er síðar fékk nafnið Landgræðsla Íslands, var rifjuð upp.
Þrátt fyrir eyðilegt umhverfið að sjá opnaðist á göngunni kyngimögnuð bók sagna og jarðmótunar Reykjanessins - í allar áttir."

Fleiri myndir frá göngunni á http://www.ferlir.is/?id=11226.