Pósthús og banki verður gistiheimili
Húsnæðis-, skipulags- og byggingaráð Sandgerðisbæjar hefur samþykkt að ráðist verði í breytingar á fyrrum pósthúsi og banka við Suðurgötu 2-4 í Sandgerði. Húsnæðinu verður breytt í gistiheimili.
Landsbankinn og Pósturinn voru með starfsemi í húsnæðinu fram til ársins 2014 að bankinn skellti í lás og Pósturinn fór að afgreiða póstsendingar með bíl sem er á ferð um bæinn. Lokun bankaútibúsins féll ekki í kramið hjá Sandgerðinum sem fóru á fund bankastjóra Landsbankans og færðu honum formleg mótmæli.
Saga póstafgreiðslu í Sandgerði er löng og komst m.a. í fréttirnar á seinni hluta síðustu aldar þegar þar voru framin pósthúsrán oftar en einu sinni. Pósthúsræninginn þekktist ekki en var sagður hafa lyktað af Old Spice rakspýra.