Pólverjar í löngu jólafríi – starfsemi lítil á meðan

Lítið er um að vera nú eftir áramótin í sumum þeim fyrirtækjum sem byggt hafa starfsemi sína upp á pólsku vinnuafli. Á þetta sérstaklega við um fyrirtæki í byggingariðnaði en í sumum þeirra liggur starfsemin nánast niðri fram í miðjan janúar. Ástæðan er sú að Pólverjarnir eru heima í jólafríi.

Þeir verktakar sem VF hefur rætt við segja Pólverjana yfirleitt leggja talsverða áherslu á að semja um lengra frí á þessum tíma til að þeir geti dvalið í heimalandinu hjá fjölskyldum sínum yfir hátíðarnar. Þeir líti margir hverjir á þetta sem orlof fremur en þau hefðbundnu leyfi sem tíðkast á sumartímanum. Einnig er það nokkuð algengt að menn eigi orðið frítökurétt vegna yfirvinnu og þeir nýti hann á þessum tíma. Það er því heldur rólegra nú um stundir í byggingargeiranum.