Pokasjóður gefur 20 milljónir króna fyrir jólin

Í dag afhenti stjórn Pokasjóðs Hjálparstarfi kirkjunnar og Mæðrastyrksnefnd Reykjavíkur 20 milljónir króna til að deila út til þurfandi fyrir jólin. Framlagi Pokasjóðs er skipt til helminga milli þessara hjálparstofnana og er í formi gjafakorta sem gilda í matvöruverslunum innan sjóðsins. Inneign á hverju korti er 10.000 kr. Gjafakortin nýtast til kaupa á öllum vörum til jólanna sem fást í verslunum innan Pokasjóðs, en þær eru um 160 talsins um allt land.

Framlag Pokasjóðs var afhent í Grensáskirkju. Bjarni Gíslason framkvæmdastjóri Hjálparstarfs kirkjunnar og Anna Pétursdóttir formaður Mæðrastyrksnefndar Reykjavíkur tóku á móti framlaginu úr hendi Bjarna Finssonar, formanns stjórnar Pokasjóðs.

Suðurnesjamenn eiga fulltrúa í stjórninni en það er Ómar Valdimarsson, forstjóri Samkaupa.