„Persónulegt álit og ekki í samræmi við stefnu A-listans“

Guðbrandur Einarsson, oddviti A-listans í Reykjanesbæ, segir skoðun nefndarmanna A-listans í Íþrótta- og tómstundaráði, vera þeirra persónulega álit og ekki í samræmi við stefnu A-listans í aðdraganda síðustu kosninga.

Eins og greint er frá í frétt hér á vefnum felldu sjálfstæðismenn tillögu  A-listans um 24 þúsund króna hvatagreiðslur til niðurgreiðslu gjalda  vegna þátttöku í menningar, -íþrótta,- og tómstundastarfi.

Í bókun sem bæjarstjóri lagði fram kemur fram afstaða nefndarfulltrúa A-listans í ÍT þar sem þeir fagna tillögu sjálfstæðismanna um 7 þúsund króna hvatagreiðslur í upphafi árs og leggja til stighækkandi hvatagreiðslur á næstu árum. Á þeim forsendum var tillögunni hafnað.

„Þessi skoðun nefndarmanna A-lista var þeirra persónulega álit og mótaðist væntanlega af þeirri staðreynd að sjálfstæðismenn eru með meirhluta í bæjarstjórn Reykjanesbæjar. En hún var ekki í samræmi við stefnu A-listans sem kynnt var í aðdraganda síðustu kosninga. Því gerðu bæjarfulltrúar A-lista athugasemd við þetta sjónarmið þegar  það kom fram i fundargerð á sínum tíma, sátu hjá við afgreiðslu hennar og lýstu því yfir að tillaga um hvatagreiðslur í samræmi við stefnu A - lista kæmi fram á réttum tímapunkti. Þessu var einnig lýst á bæjarstjórnarfundi í gær þegar að sjálfstæðismenn felldu tillögu A-lista um 24.000 kr. hvatagreiðslur til grunnskólabarna,“ sagði Guðbrandur Einarsson í samtali við VF.