Partýstand og útsýni yfir garða og sólpalla

Skipasmíðastöð Njarðvíkur óskaði í vor eftir heimild til að bæta við hæð ofan á spilhús við Sjávargötu 6 í Njarðvík. Hæðin yrði notuð sem gistirými fyrir starfsmenn skipasmíðastöðvarinnar, segir í umsókn skipasmíðastöðvarinnar sem lögð var fyrir umhverfis- og skipulagsráð Reykjanesbæjar í vor. Þar var umsóknin samþykkt með fyrirvara um grenndarkynningu án athugasemda.

 

Athugasemdatíminn er liðinn og bárust athugasemdir frá ellefu einstaklingum í fimm liðum. Samandregnar eru athugasemdir eftirfarandi:

 

Hljóðvist og partýstand. Partýstand og annað getur orðið daglegt brauð.

- Skipulagsyfirvöld taka ekki afstöðu til fullyrðinga um mögulega áfengisneyslu íbúa bæjarfélagsins á eigin heimili.

 

Innsýn í garða. Íbúar munu hafa útsýni yfir garða og sólpalla, sem dregur úr áhuga á að nýta lóðir.

- Mörg íbúðarhús í nágrenninu eru tvær hæðir svo búast má almennt við innsýn í garða frá næsta nágrenni.

 

Verbúðir og ógn við fjölskyldulíf og börn sérstaklega. Á reitinn verða mögulega komnir um 200 einstaklingar. Börn hverfisins geta líklega ekki leikið frjálst í nærumhverfi sínu.

- Íbúar Reykjanesbæjar hafa allir jafnan aðgang að opnum svæðum bæjarins.

 

Skert útsýni. Þriggja hæða bygging skerðir útsýni á Reykjanesfjallgarðinn.

- Útsýni skerðist mögulega að einhverju leyti.

 

Umferðarmál og bílastæði. Umferð um hverfið hefur aukist svo að hverfið er við þolmörk. Ekki er gert ráð fyrirbílastæðum.

- Réttmæt ábending varðandi bílastæði og aðkomu. Breyta þarf tengingu Sjávargötu við Klapparstíg og Tunguveg svo umferð tengd Njarðvíkurhöfn villist ekki inn í hverfið. Sýna þarf fram á nægan fjölda bílastæða og aðkomu að þeim á uppdrætti.

 

Umhverfis- og skipulagsráð Reykjanesbæjar hefur frestað afgreiðslu málsins.