Óvenju margir ölvaðir í umferðinni á Suðurnesjum

Óvenju margir hafa verið ölvaðir í umferðinni á Suðurnesjum á síðustu dögum. Sex einstaklingar hafa verið teknir fyrir ölvunarakstursbrot vikuna 11. til 18. október og þar af voru fimm brotanna framin um sl. helgi.

Samkvæmt upplýsingum frá lögreglunni á Suðurnesjum lentu tveir ölvaðir ökumenn í umferðaróhöppum. Annar þeirra ók á ljósastaur í Reykjanesbæ en hinn velti bíl sínum á Reykjanesbraut.

Það sem af er þessu ári hafa 77 einstaklingar verið teknir fyrir ölvunarakstursbrot. Það er mikil fækkun frá síðasta ári, þegar sem 112 höfðu verið teknir á sama tíma og enn meiri fækkun frá því 2008 þegar 150 einstaklingar höfðu verið teknir fyrir ölvunarakstursbrot á þessum tíma árs.