Óveðrið í kvöld: „Með því versta sem við sjáum“

Illviðrið sem nú er í aðsigi er með því verra sem við sjáum, segir Einar Sveinbjörnsson, veðurfræðingur á veðurbloggi sínu.  Um landið sunnanvert er reiknað með að meðalvindur verði allt að 25 m/s. Búist er við að óveðrið nái hámarki suðvestanlands milli klukkan 17 og 20 í kvöld. „Þessu fylgir ausandi rigning á meðan verst lætur.  Gengur hratt niður í kjölfar þess að það nær hámarki,“ segir Einar sem býst við að veðurhæðin á Reykjanesbraut verið um 25 m/s um kvöldmatarleytið.

Rétt er að brýna fyrir fólki að gæta að lausum munum sem auðveldlega geta fokið af stað og valdið tjóni í veðri sem þessu.

Á meðfylgjandi veðurkortum af belgingur.is má sjá hvernig útlitið er kl. 15 (efra kortið) og svo aftur kl. 19 í dag. Hvert strik í vindörinni táknar 5 m/s. Flagg í örinni táknar 25 m/s. Af þessu má ráða að vindur verði meiri á sunnanverðum Reykjanesskaganum þannig að Grindvíkingar mega búast við hinu versta.  Talsverð úrkoma mun fylgja þessu eins og litaskalinn sýnir.


Veðurblogg Einars Sveinbjörnssonar