Ótrúlegur subbuskapur í Háabjalla

Hvað fólkinu gekk til sem nýlega hafði viðkomu í Háabjalla hér á Suðurnesjum, er erfitt að ímynda sér, annað en að þar hafa verið á ferð subbur og sóðar sem ekki kunna snefil af umgengni við náttúruna.

Eins og sést á meðfylgjandi myndum sem útivistarfólk tók í gær, skírdag, og sendi til okkar á Víkurfréttum, þá er umgengni um svæðið á þeim nótum að mikil skömm er af. Þarna hefur verið haldin mikil veisla í mat og drykk.

Viðlegubúnaður ýmiskonar er á víð og dreif um svæðið, gasgrill í skógarrjóðri sem í dag er mjög óaðlaðandi. Áfengisumbúðir um allar jarðir og matarleyfar. Meira að segja hefur verið skilið eftir kjötmeti á svæðinu sem subbugestirnir hafa ekki haft fyrir því að grilla.

Þá er öxi á staðnum sem bendir til þess að stunda hafi átt skógarhögg á svæðinu.

Hafi verið um lautarferð ungmenna að ræða er ástæða til að foreldrar hafi tal af sínu fólki, sérstaklega ef það kannast við eitthvað af þeim munum er sjást á meðfylgjandi myndum.

Vonandi hafa þeir eða þau sem gengu svona um Háabjalla manndóm í sér til að mæta aftur á svæðið og taka saman ruslið og óþverran, sem ætla má að hafi verið skilinn eftir í dómgreinarleysi áfengisdrykkju, en umbúðir af áfengi benda til þess að drukkið hafi verið úr hófi og eitthvað meira en einn léttur með grillsteikinni.

Hér með er skorað á sóðana að taka saman eftir sig ruslið og koma því til eyðingar hjá Kölku eða koma því á næsta gámasvæði sem tekur við rusli sem þessu. Það kostar ekki neitt og samviskan verður örugglega betri á eftir.