Öryggið á oddinn

Sú vísa er aldrei of oft kveðin að fara eigi gætilega með eld. Því er áríðandi að gera varúðarráðstafanir áður en maður kveikir á kertum og aðventukrönsum um allt hús. Guðmundur Ólafsson í Öryggismiðstöð Suðurnesja segir að það séu oft sömu mistökin sem fólk gerir sem geri það að verkum að það kviknar í.
„Það sem helst veldur eldsvoða um jól og áramót er eldur frá kertum eða kertaskreytingum. Aðalhættan er röng staðsetning, til dæmis ef skreyting er of nálagt gardínum eða brennanlegum efnum, einnig er mikil hætta ef kertin brenna niður og kveikja í skrautinu í kringum kertin. því miður er þetta allt of algengt en þetta á ekki að vera hægt ef skreytingin er rétt gerð. Til er eldtefjandi efni sem hægt er að sprauta á skreytinguna þannig að hún brenni síður, svo þarf að staðsetja kerti og kertaskreytingar þannig að lítil börn komist ekki í þær ", segir Guðmundur og bendir á að það séu til mjög einfaldar lausnir til til að verjast eldsvoða. Hann bendir einnig á að um jól og áramót sé gífurleg notkun á kertum og rafmagni og þess vegna sé eldhættan meiri.
Reykskynjari þarf að vera til á hverju heimili, rétt staðsettur og í lagi, einnig eldvarnateppi, slökkvitæki og sjúkrakassi. Til eru brunagrisjur og gel í nokkrum stærðum og gerðum sem ættu að vera í öllum sjúkrakössum en þær eru mjög góðar sem fyrsta hjálp á öll brunasár. Öryggismiðstöð Suðurnesja er með allan búnað til öryggis og eldvarna, þar er líka boðið upp á ráðgjöf og þjónustu fyrir heimili og fyrirtæki. Svona að lokum má minna á það að það er ekki nóg að reykskynjarinn sé í lagi, það þurfa líka að vera heilar rafhlöður í honum.