Opið að gosstöðvunum í dag
Eldgosasvæðið í Meradölum er opið í dag.
Vinsamlega kynnið ykkur leiðbeiningar á safetravel.is á slóðinni: https://safetravel.is/eldgos
Upplýsingar um fjölda fólks sem fer um gossvæðið má finna á heimasíðu Ferðamálastofu: https://www.maelabordferdathjonustunnar.is/is/ferdamenn-a-islandi/gosslod-geldingadalir Gera má ráð fyrir að þessar tölur séu mun hærri.
Bannað er að aka vélknúnum ökutækjum utan vega. Ólögmætur akstur utan vega varðar refsingu. Sjá nánar á heimasíðu Umhverfisstofnunar: https://www.ust.is/
Spá Veðurstofunnar um gasdreifingu
Norðan 5-13 m/s í dag (föstudag) og skúrir, en 8-15 undir kvöld. Gasmengun ætti því að berast í suðurátt frá gosstöðvunum.
Mikilvæg skilaboð frá Veðurstofu fyrir þá sem ætla að fara að gosstöðvunum
- Gasmengun við gosstöðvarnar getur alltaf farið yfir hættumörk, mengunin leggst undan vindi og því öruggast að horfa til eldgossins með vindinn í bakið.
- Í hægviðri (<5 m/s) getur gas safnast fyrir í lægðum, þá stjórnast vindafar af landslagi og gas getur verið yfir hættumörkum langt upp í hlíðar, allan hringinn í kringum gosstöðvarnar. Í slíkum tilfellum þurfa áhorfendur að færa sig upp á fjöll og hryggi en ekki halda sig í brekkunum fyrir ofan.
Foreldrum með börn yngri en 12 ára verður snúið frá leið A af öryggisástæðum að svo stöddu. Áætla má að ferðalagið taki að lágmarki 5 til 6 klukkustundir. Gætt getur gasmengunar á gönguslóð og þá sérstaklega í nálægð við gosið. Börn hafa minna þol gagnvart loftmengun og eru skilgreind sem viðkvæmur hópur. Þá er ekki ráðlegt að börn dvelji lengur en 15 mínútur á stað þar sem loftmengun er yfir heilsuverndarmörkum, sjá upplýsingar á heimasíðu embættis landlæknis.
Börnum yngri en 12 ára er ekki hleypt að gosinu sjálfu og fylgjast viðbragðsaðilar með umferð við upphaf gönguleiðar A að gosinu. Göngumenn fari gætilega og haldi sig fjarri hraunjaðri. Þá er vakin athygli á því að enn er unnið að lagfæringum á þessari leið.
Öryggisreglur sæta reglulega endurskoðun.
Foreldrum ungra barna er bent á auðvelda gönguleið inn í Nátthaga þar sem skoða má hraunið sem rann í gosinu í fyrra. Þaðan sést ekki til gossins inn í Meradölum.
