Öll börn eru okkar börn

„Á Íslandi ætti ekkert barn að líða efnislegan skort,“ segir Oddný Harðardóttir, þingmaður Samfylkingarinnar, en nýlega sat hún fund á vegum UNICEF, verkefnastjórnar um heimsmarkmið Sameinuðu þjóðanna, Hagstofu Íslands og Alþjóðamálastofnunar Háskóla Íslands þar sem kynnt var skýrsla um stöðu barna í efnameiri ríkjum.

Oddný segir Ísland standa sig vel á mörgum sviðum er varðar velferð barna en að það megi sannarlega gera betur. „Þúsundir barna geta því miður ekki tekið þátt í félags- og íþróttastarfi vegna þess að foreldrarnir eiga ekki peninga nema rétt fyrir fæði, klæði og húsnæði. Tónlistarnám á Íslandi er nánast bara fyrir börn efnameira fólks. Það finnst mér ekki ganga og því verður að breyta. Það eru til áhrifamiklar og einfaldar leiðir til þess að bæta úr þessu en þær eru ekki nýttar. Þessu mætti til dæmis breyta með því að nota jöfnunartækin sem ríkið á og hafa sýnt sig að virka best, barnabætur og vaxtabætur. Þessi jöfnunartæki hafa illu heilli verið veikt mjög mikið vegna aðgerða síðustu ríkisstjórnar og sú sem nú heldur um stjórnartaumana hefur sýnt á spilin í fimm ára fjármálaáætlun og ætlar að veikja þau enn frekar. Á meðan mun staða margra barna versna.“

Oddný segir margt hægt að gera til að bæta stöðu barna hér á landi. „Við eigum ekki bara að sætta okkur við að vera ofarlega í mælingum á velferð barna, við eigum að vera efst og best í því að gæta að góðum lífsgæðum allra barna. Það er hægt og við höfum efni á því. Akureyrarbær hefur tekið að sér að gera tilraun sem barnvænt sveitarfélag þar sem áhersla er lögð á að framfylgja barnasáttmála Sameinuðu þjóðanna, að börn eigi talsmann á þeim stöðum sem þau verja mestum tíma og markvisst sé unnið úr upplýsingum sem til staðar séu, t.d. um ofbeldi gegn börnum og heimilisofbeldi,“ segir hún en hugmyndin er sú að Akureyri verði fyrirmynd annarra sveitarfélaga í þessum efnum. Þá segir hún að forgangsröðun stjórnvalda, hvort sem það sé ríkisins eða sveitarfélaganna, skipti mestu máli, þ.e. að málefnum barna og ungra fjölskyldna sé raðað framar þegar velja á í hvað opinberir fjármunir fari. „Mér finnst staða barna efnaminni fjölskyldna óásættanleg og vil ekki hætta fyrr en við getum verið viss um að öll börn séu með og ekkert barn skilið eftir.“

Oddný bendir á að það séu mörg börn á Íslandi sem verði fyrir obeldi af hálfu fullorðinna sem misnoti þau með ýmsum hætti. „Þetta gerist hér á landi og við eigum að gera allt sem við getum til að vernda öll börn gegn slíku. Þar skiptir t.d. máli að lögreglan sé ekki fjársvelt og að hún hafi þekkingu og bolmagn til að sinna slíkum málum hratt og vel. Og að við þegjum aldrei ef við höfum grun um að ofbeldi hafi átt sér stað. Svo er styrkur til barnahjálpar hvar sem er í heiminum svo mikilvægur. Öll börn eru okkar börn og við eigum að tryggja þeim öllum gott líf.“

[email protected]