Ökuréttindalaus með fíkniefni

Lögreglumenn í Keflavík höfðu snemma í gærmorgun afskipti af ökumanni í Keflavík vegna gruns um ölvun við akstur.  Hann var auk þess án ökuréttinda þar sem hann hafði verið sviptur þeim áður.  Leit var gerð á ökumanninum og farþega í bifreiðinni vegna gruns um fíkniefnamisferli.  Við þá leit fannst á farþeganum meint fíkniefni, um eitt gramm af hassi og eitt gramm af amfetamíni.  Við leit í bifreiðinni fundust síðan um þrjú grömm af amfetamíni.  Ökumaðurinn og farþeginn voru vistaðir í fangaklefa vegna málsrannsóknar.  Þeim var síðan sleppt síðar í gær eftir yfirheyrslu.

Mynd úr safni