Ók yfir handlegg á barni og stakk af

Ökumaður Patrol-jeppa ók yfir handlegg á barni á mótum Skólavegar og Háaleitis í Keflavík sl. þriðjudagskvöld og stakk af frá vettvangi. Lögreglan í Keflavík lýsir nú eftir ökumanninum og vill hafa af honum tal.
Málavextir eru þeir að sjö ára stúlka var að hjóla eftir Skólaveginum sl. þriðjudagskvöld á tímabilinu kl. 20:00 til 20:30. Við gatnamót Háaleitis og Skólavegar missti stúlkan jafnvægi á hjóli sínu og datt í götuna. Í sömu mund var Nissan Patrol jeppa ekið um gatnamótin. Hjólbarði jeppans fór yfir handlegg stúlkunnar. Sá sem ók jeppanum virðist hins vegar ekki hafa orðið þess var og ók á brott af vettvangi. Stúlkan hlaut áverka á handleggnum en er óbrotin.
Samkvæmt frásögn stúlkunnar var jeppinn gylltur að lit með gráum hliðum og svarta hlíf yfir varadekki. Vinkona stúlkunnar staðfestir að um Patrol-jeppa hafi verið að ræða.
Lögreglan í Keflavík vill hafa tal af ökumanni jeppans eða heyra frá hugsanlegum sjónarvottum eða aðilum sem vita um hvaða jeppabifreið er átt. Samband við lögreglu fæst með því að hringja í síma 420 2400 eða í Neyðarlínuna  í síma 112.

Loftmynd af umræddum gatnamótum þar sem slysið átti sér stað. Ljósm: Oddgeir Karlsson