Ók inn á öryggissvæði í leit að húsi vinkonu
– undir áhrifum ópíumblandaðs efnis og kannabis.
Þrír ökumenn voru handteknir í umdæmi lögreglunnar á Suðurnesjum um helgina vegna fíkniefnaaksturs. Karlmaður um tvítugt reyndist hafa neytt kannabis, að því er sýnatökur á lögreglustöð staðfestu. Í bifreið hans, sem úr barst mikil kannabislykt fannst glerkrukka með tveimur kannabispokum í. Annar ökumaður á svipuðum aldri reyndist einnig hafa neytt kannabis. Sá þriðji, karlmaður á þrítugsaldri var, auk kannabisneyslu, sviptur ökuréttindum.
Áður hafði kona á sjötugsaldri ekið á bómuhlið og í gegnum að aðstöðu Landhelgisgæslunnar á Keflavíkurflugvelli og þar með inn á lokaða öryggissvæði. Hún kvaðst hafa verið að leita að húsi vinkonu sinnar og hreinlega ekki séð bómuhliðið. Sýnatökur staðfestu að hún hafði neytt ópíumblandaðs efnis og kannabis.
