Ók á þreföldum hámarkshraða

Ökumaður sem lögreglan á Suðurnesjum stöðvaði um helgina ók á 103 km hraða, ásamt því að aka of hratt var hann einnig með aðra bifreið í dráttartaug á Reykjanesbrautinni. Þegar lögregla ræddi við ökumanninn eftir að hann var stöðvaður var honum tilkynnt að hámarkshraði þegar verið væri að draga bíl með þessum hætti væri 30 km á klukkustund. Ökumaðurinn ók því á rúmlega þreföldum hámarkshraða, bíllinn sem hann dró var einnig ljóslaus að aftan.

Nokkrir ökumenn til viðbótar voru kærðir fyrir of hraðan akstur. Sá sem hraðast ók mældist á 157 km hraða á Reykjanesbraut þar sem hámarkshraði er 90 km á klukkustund.
Loks var einn ökumaður stöðvaður vegna gruns um ölvun við akstur og annar vegna gruns um fíkniefnaakstur. Sá síðarnefndi viðurkenndi neyslu fíkniefna, hann hafði áður verið sviptur ökuréttindum ævilangt.