Ók á 80 í götu með 30 km hámarkshraða

Lögreglan á Suðurnesjum hafði um helgina afskipti af tæplega tvítugum ökumanni sem ók á mikilli ferð um götur Keflavíkur. Á vegarkafla, þar sem hámarkshraði er 30 kílómetrar á klukkustund ók hann á 80 kílómetra hraða, meðal annars um svæði þar sem margt fólk var á ferli. Að auki reyndist hann ekki vera með ökuskírteinið meðferðis. Hann var kærður fyrir hið síðarnefnda, auk hraðakstursins.

Sjö ökumenn til viðbótar voru kærðir fyrir of hraðan akstur í umdæminu um helgina. Öll áttu brotin sér stað á Reykjanesbraut. Sá sem hraðast ók mældist á 130 kílómetra hraða þar sem hámarkshraði er 90 kílómetrar á klukkustund. Tveir af ökumönnunum sjö voru erlendir ferðamenn.

Þá hafði lögregla afskipti af ökumanni sem ók bifreið án skráningarnúmera eftir Reykjanesbraut. Ökumaðurinn greiddi 7.500 króna sekt á staðnum. Loks voru skráningarnúmer fjarlægð af ótryggðri bifreið.