Ofbeldi einkennir nýársnótt á Suðurnesjum

 

Talsvert var um útköll hjá lögreglunni á Suðurnesjum í nótt og fram eftir morgni.  Fimm líkamsárásir voru tilkynntar til lögreglunnar. 

 

Ein árás var í Vogunum þar sem menn gengu í skrokk á íbúa í blokk, sem endaði með því að manninum var hent fram af svölum.  Maðurinn kenndi til í baki og fótum og far fluttur með sjúkrabifreið á Heilbrigðisstofnun Suðurnesja (HSS) til skoðunar.  Árásaraðilinn var handtekinn og gistir nú fangageymslur lögreglunnar. 

 

Ungur maður var skallaður á Hafnargötunni í Keflavík um kl. 07:00 og brotnaði í honum tönn við árásina.

 

Þá var stúlka lamin með glasi í andlitið á skemmtistað í Reykjanesbæ.  Stúlkan var flutt á HSS og kom í ljós að hún var nefbrotin og með litla skurði á nefi.  Gerandinn handtekinn og gistir nú fangageymslur lögreglunnar og bíður yfirheyrslu.

 

Tilkynnt var um líkamsárás í Grindavík þar sem maður var lamin í andlitið með steini.  Lögreglan kom hinum slasaða á HSS til skoðunar og gerandinn færður í fangahús.

 

Þá var maður sleginn undir morgun á skemmtistað í Reykjanesbæ.  Hann leitaði sér aðhlynningar á HSS og er talinn vera nefbrotinn. 

 

Einn ökumaður var tekinn grunaður um ölvun við akstur undir morgun í Reykjanesbæ.