Ófærð á Suðurnesjum

Skólastjórinn í Grindavík tók þá ákvörðun í morgun að fella niður skólahald til klukkan hálf eitt í dag vegna veðurs. Björgunarsveitir hafa verið að bjarga fólki úr bílum og aðstoða bæjarbúa sem hafa lent í vandræðum. Snjó hefur skafið í stóra skafla og þungfært er um götur eða jafnvel ófært.

Ökumaður missti stjórn á bíl sínum nú áðan og lenti á ljósastaur á Reykjanesbraut við Grænás. Að sögn lögreglu er mikil hálka og slæm færð á Suðurnesjum því mikið hefur snjóað í nótt. Lögreglan varar vegfarendur við því að leggja af stað á illa búnum bílum.

Á vef Vegagerðinnar segir að snjóþekja og skafrenningur sé á Suðurnesjum, á Reykjanesbraut er hálka og snjókoma. Hálka, éljagangur, og skafrenningur er á Sandskeiði, Hellisheiði og í Þrengslum. Á öðrum leiðum á Suðurlandi eru hálkublettir.

Mynd: Vegakort Vegagerðinnar sýnir hálku og skafrenning á Reykjanesbraut. Krap og snjór er á Grindavíkurvegi, einnig til Garðs og Sandgerðis. Þungfært er á Reykjanesi.