Of flókið að nefna sveitarfélag Suðurnes

Óskað var eftir umsögn Grindavíkurbæjar um tillöguna Suðurnes vegna nafns á nýtt sameinað sveitarfélag Garðs og Sandgerðis. Nafnið Suðurnes var í þremur útfærslum; Suðurnesjabyggð, Suðurnesjabær eða Sveitarfélagið Suðurnes.

Í leiðbeiningum Örnefnanefndar er kveðið á um að nafn á sveitarfélagi skuli tengjast viðkomandi svæði sérstaklega. Ef nafn það sem óskað er staðfestingar á tengist einnig svæði sem ekki tilheyrir viðkomandi sveitarfélagi ber að hafa eftirfarandi til viðmiðunar:
Krafa er gerð um að viðkomandi sveitarfélag nái yfir meiri hluta þess svæðis sem nafnið tengist og að meiri hluti íbúa svæðisins búi í því sveitarfélagi.
Jafnframt liggi fyrir að önnur sveitarfélög á svæðinu sem kunna að tengjast nafninu mótmæli því ekki sérstaklega að nafnið verði notað af sveitarfélaginu.

Bæjarstjórn Grindavíkur tók undir með bæjarráði Sveitarfélagins Voga sem var svohljóðandi: Bæjarráð bendir á að með því að velja nafn á sveitarfélagið sem innifelur orðið "Suðurnes" kunna að koma upp flækjustig gagnvart þeim samtökum og sameiginlegu stofnunum sem eru í landshlutanum og kenna sig við Suðurnes.