Nýráðinn skólastjóri hættir

Sveinn Alfreðsson, nýráðinn skólastjóri Stóru-Vogaskóla, hefur sagt upp störfum og tilkynnt það formlega til fræðslunefndar. Hann mun láta af störfum í lok yfirstandandi skólaárs. Þá hefur aðstoðarskólastjóri sótt um námsleyfi til eins árs.

Sveinn sagði í samtali við VF ástæður uppsagnarinnar eingöngu af persónulegum toga:
„Ég hef lengi verið að velta fyrir mér meistaranámi í stjórnun og ákvað að stíga það skref núna. Jafnframt eru ákveðin skref sem ég ætla að stíga inn í Háskóla. Ég var alls ekki óánægður í starfi hér, heldur þvert á móti. Þetta er frábært sveitarfélag og yndislegt fólk sem hér býr. Ég vil nota tækifærið og þakka öllu því frábæra fólki sem ég hef haft samskipti við hér í Vogum og víðar,“ sagði Sveinn, sem tók við skólastjórastöðunni síðasta haust.

Fræðslunefnd leggur til að bæjarráð hefji nú þegar vinnu við ráðningarferli stjórnenda við Stóru-Vogaskóla.

Mynd: Sveinn Alfreðsson ætlar í meistaranám. Staða skólastjóra Stóru-Vogaskóla er því að losna.