Ný íslensk kvikmynd tekin upp í Keflavík

Hinir góðkunnu leikarar Sigurður Sigurjónsson og Jón Gnarr voru við upptökur á nýrri íslenskri kvikmynd við golfskálann í Leiru, þegar ljósmyndari VF var þar á ferð í vikulokin.

Að sögn Júlíusar Kemp, framleiðanda og tökumanns myndarinnar „Maður eins og ég“, gengu upptökur vel, enda er valinn maður í hverju horni. Hópurinn sem stendur að baki kvikmyndinni, er að mestu leyti sá sami og gerði hina vinsælu kvikmynd, Íslenska drauminn.
„Höfundar handrits eru Róbert E. Douglas og Árni Ólafur Ásgeirsson en Róbert leikstýrir einnig myndinni. Sagan gerist í Kópavogi, Keflavík og í Hong Kong og fjallar um ungan íslenskan mann sem á erfitt uppdráttar í ástarmálunum. Jón Gnarr leikur aðalhlutverkið og Siggi Sigurjóns leikur pabba Jóns, en hann er gamall poppari sem býr í Keflavík. Við erum búnir að taka suðurfrá í bili en komum aftur seinna til að taka meira og myndum þá einnig á Vellinum“, segir Júlíus.
„Maður eins og ég“ verður frumsýnd í ágúst á næsta ári í Nýja Bíó í Keflavík og Sam-bíóunum í Reykjavík.