Nefskattur í stað afnotagjalda árið 2008

Samkvæmt frumvarpsdrögum Þorgerðar Katrínar, menntamálaráðherra, munu afnotagjöld Ríkisútvarpsins verða lögð niður árið 2008. Þetta kemur fram á vefsíðu Ríkisútvarpsins í dag. Öllum lífeyrisskuldbindingum verður aflétt af stofnuninni og einnig hlut Ríkisútvarpsins í rekstri Sinfóníuhljómsveitar Íslands en árlegur kostnaður Ríkisútvarpsins vegna lífeyrisskuldbindinga og Sinfóníunnar nemur um 300 milljónum króna.

Fram kom í hádegisfréttum RÚV í dag að frumvarpið væri á lokastigi. Afnotagjöld yrðu lögð niður og í staðinn tekinn upp nefskattur og útvarpsráð lagt niður og í stað þess kæmi ráðherraskipuð rekstrarstjórn. Fréttastofa RÚV hefur heimildir fyrir því að afnotagjöldin verði, samkvæmt frumvarpinu, lögð niður árið 2008. Í staðinn kemur nefskattur, sem ekki er búið að útfæra endanlega, en mun ekki færa Ríkisútvarpinu minni tekjur en það hefur nú af afnotagjöldum.

www.ruv.is