NATO skiptir sér ekki af varnarviðræðum

Atlantshafsbandalagið ætlar ekki að blanda sér í viðræður Íslendinga og Bandaríkjamanna um varnarmál landsins nema annað ríkið óski þess, sagði yfirhershöfðingi Atlantshafsbandalagsins eftir fund með forsætisráðherra í dag. Ríkisútvarpið greinir frá þessu.

Geir Haarde forsætisráðherra og James L. Jones, yfirhershöfðingi Atlantshafsbandalagsins, ræddu varnarmál Íslands og viðræður við Bandaríkjamenn um þau á hádegisfundi á Þingvöllum í dag. Eftir fundinn sagði Jones hershöfðingi að Atlantshafsbandalagið skipti sér ekki af viðræðunum nema annað ríkið óskaði þess. Jones svaraði ekki hvort bandalagið gæti komið sýnilegum vörnum fyrir hér en það væri skuldbundið til að tryggja varnir Íslands samkvæmt fimmtu grein stofnsáttmálans.

Næsti fundur Íslendinga og Bandaríkjamanna í varnarviðræðunum er 7. júlí. Geir Haarde segir að ríkisstjórnin hafi unnið að undirbúningi fyrir fundinn og gerir ráð fyrir að Bandaríkjamenn hafi gert það líka. Hann segir að málið þyrfti helst að klárast áður en Bandaríkjamenn fara héðan í haust.