Missti stýri undir Staðarbergi
– staddur aðeins um 0,4 sjómílum frá landi
Björgunarskipið Oddur V. Gíslason og björgunarbáturinn Árni í Tungu frá Grindavík eru nú að aðstoða sjómann er var á strandveiðum undir Staðarbergi á Reykjanesi þegar stýrisbúnaður bilaði.
Þrátt fyrir að ágætisveður sé á staðnum voru bjargir kallaðar út á fyrsta forgangi þar sem báturinn var staddur aðeins um 0,4 sjómílum frá landi.
Árni í Tungu er kominn að hinum bilaða báti og nokkrar mínútur eru í björgunarskipið sem mun draga bilaða bátinn til hafnar.
