Missti mótor 60 mílur vestur af landinu

Flugvél af gerðinni Short SH36 var í þessu að lenda í Keflavík en hún missti afl á öðrum hreyflinum er hún var stödd 60 sjómílur vestur af Íslandi á leið til Reykjavíkur frá Narsarrsaq í Grænlandi. Morgunblaðið á Netinu segir að um borð í flugvélinni, sem er smíðuð í Norður-Írlandi, séu fjórir menn en hún getur tekið mun fleiri í sæti. Var hún á leið til Reykjavíkur en eftir að flugmaðurinn tilkynnti um neyð sína ákvað hann að lenda heldur í Keflavík þar sem þangað var styttra.Flugmaðurinn sendi út neyðarkall klukkan 20:50 í kvöld og greip Flugmálastjórn til mikilla viðbúnaðarráðstafana. Var þyrla Landhelgisgæslunnar m.a. kvödd út.