Mikilvægt skref í að bæta þjónustu við bæjarbúa

Kauptilboð Sveitarfélagsins Voga í þrjá eignarhluta í Iðndal 2 hefur verið samþykkt af seljanda. Kauptilboðið var gert með fyrirvara um samþykki bæjarstjórnar.

Bæjarráð Sveitarfélagsins Voga tók málið fyrir á síðasta fundi. Bæjarráð leggur til við bæjarstjórn að staðfest verði kaup sveitarfélagsins, sbr. fyrirliggjandi kauptilboð. Með kaupunum er stigið mikilvægt skref í að bæta þjónustu við bæjarbúa og því mikilvæga verkefni að koma á fót þjónustu heilsugæslu í Vogum.

Bæjarráð samþykkir jafnframt að vísa fyrirliggjandi viðauka við fjárhagsáætlun 2022 til bæjarstjórnar og felur bæjarstjóra að undirbúa afgreiðslu lánasamnings vegna kaupanna sem jafnframt verður lagður fram til afgreiðslu bæjarstjórnar.