Mikilvægt að kynnast Suðurnesjum

Hildur Jakobína Gísladóttir tók í byrjun árs við stöðu forstöðumanns Vinnumálastofnunar á Suðurnesjum. Hildur er með grunnmenntun í sálfræði, MBA gráðu frá Háskólanum í Reykjavík og hefur lokið námi í stjórnendamarkþjálfun frá sama skóla. Undanfarin ár hefur hún starfað sem félagsmálastjóri á Ströndum, í Reykhólahreppi og í Hvalfjarðarsveit. Árið 2014 stofnaði hún ráðgjafafyrirtækið Officium ráðgjöf ásamt Brynju Bragadóttur heitinni þar sem þær sinntu meðal annars stjórnendaráðgjöf.

Nýja starfið leggst vel í Hildi. „Það er alltaf gaman að koma inn í ný samfélög. Mér finnst mikilvægt að kynnast samfélaginu hérna á Suðurnesjum og ég mun vinna markvisst í því næstu daga og mánuði. Sennilega veitir maður betri ráðgjöf og þjónustu þegar maður skilur bakgrunn, samsetningu, sögu og menningu samfélagsins.“ segir Hildur sem ólst upp í Hlíðunum í Reykjavík en býr nú í Garðabæ.