Mikil fjölgun á Suðurnesjum

Suðurnesjamönnum fjölgaði um rúmlega 800 á síðasta ári, en samkvæmt mannfjöldamælingum Hagstofu Íslands töldu þeir 17.899 þann 1. desember síðastliðinn.

Um er að ræða 4.7% fjölgun, en það er langmesta fjölgunin í landshlutum sem liggja að höfuðborgarsvæðinu. Mesta hlutfallslega fjölgunin á Suðurnesjum var í Sandgerði þar sem hún var 9.8%.

Í fjölmennasta sveitarfélagi landshlutans, Reykjanesbæ var fjölgunin 3.5% eða úr 10954 upp í 11346 íbúa. Heildarfjölgun eru 392 íbúar.

Í Grindavík var fjölgunin 5.8% eða úr 2479 upp í 2624. Heildarfólksfjölgun var alls 145 manns.

Í Sandgerði er augljóst að markaðsátakið „Sandgerði innan seilingar“ hefur borið ríkulegan ávöxt því þar var fjölgunin 9.8% eða úr 1398 upp í 1535. Heildarfólksfjölgun er því 137 manns.

Í Garði nam fjölgunin 4.1% eða úr 1322 upp í 1376. Heildarfjölgun var 54 íbúar.

Þá fjölgaði íbúum Vatnsleysustrandarhrepps um 8.4%, úr 939 upp í 1018 og hafa þeir í kjölfarið sótt um bæjarréttindi. Vatnsleysustrandarhreppur mun því fljótlega breytast í sveitarfélagið Voga.

Á nýafstöðnum aðalfundi Sambands sveitarfélaga á Suðurnesjum var ályktað um hina miklu fjölgun sem hefur átt sér stað í landshlutanum og reiknuðu fundarmenn með því að íbúar Reykjanes verði vel yfir 20000 manns þegar árið 2008. Ljóst sé að Reykjaness er að koma sterkt inn sem næsta uppbyggingarsvæði í nágrenni höfuðborgarinnar og er þegar orðin mjög eftirsóttur íbúakostur.

Fundarmenn töldu að framundan væru tækifæri til sóknar á Reykjanesi. Þar verði Suðurnesjamenn að standa saman og tryggja svæðinu bjarta framtíð.