Mikil endurnýjun á lista Framsóknar í Grindavík

Á félagsfundi í kvöld var samþykkt samhljóða tillaga uppstillinganefndar að lista Framsóknar til sveitastjórnarkosninga í Grindavík í vor.

Í tilkynningu segir að uppstillinganefnd hafi verið að störfum síðustu vikurnar þar sem viðtöl voru tekin við frambjóðendur í öllum efstu sætum ásamt því sem rætt var við félagsmenn og kjósendur. Niðurstaðan var sú að Ásrún Helga Kristinsdóttir kennari skipar 1. sæti listans og Sverrir Auðunsson framkvæmdastjóri skipar 2. sæti listans.

Fólk sem er tilbúið að leggja á sig vinnu til að gera samfélagið okkar betra

„Ég er sérstaklega spennt fyrir að vinna með þessum sterka lista. Ég veit að hér er fólk sem er tilbúið að leggja á sig vinnu til að gera samfélagið okkar betra. Bæði fólk á listanum og líka fólk sem er til hliðar við hann. Við erum með gott og sterkt lið og ætlum okkar að spila sókn og hafa gaman af kosningabaráttunni“ segir Ásrún Helga Kristinsdóttir, nýkjörinn oddviti Framsóknar í Grindavík í tilkynningunni.

Árangur er ekki eins manns verk

„Árangur er ekki eins manns verk og er því gaman að tilheyra góðum hóp sem hefur samvinnu og sameiginlega sýn á að taka þátt í að betrumbæta samfélagið okkar í Grindavík“ segir Sverrir Auðunsson er skipar 2. sæti á lista Framsóknar í Grindavík.

Listi Framsóknar 2022