Mikil efnamengun og flúrsýra langt yfir neysluvatnsviðmiðum á gosstöðvunum

Rannsóknir Jarðvísindastofnunar og Veðurstofunnar á regnvatni á svæðinu hafa sýnt mikla efnamengun á gosstöðvunum í Meradölum. Meðal annars hefur flúrsýra greinst langt yfir neysluvatnsviðmiðum, allt að 60 falt magn. Einnig mælist mikil saltsýra og sýrustig er mjög lágt. Þetta kemur fram á vef Matvælastofnunar. Þar fólki ráðið frá því að taka hunda með sér að eldgosinu.

Eftir að gos hófst að nýju á Reykjanesinu hefur umferð fólks á gosstöðvarnar verið mikil. Það er enn ástæða til þess að Matvælastofnun ræður fólki eindregið frá því að taka hunda með á gosstöðvarnar í Merardölum/Geldingadölum. Það er síst minni mengun á svæðinu en áður, bæði gas og önnur efni sem geta haft skaðleg áhrif á hunda jafnt sem fólk. Jafnframt er hætta á ýmis konar slysum. Á gossvæðinu er töluvert mikið áreiti, bæði hljóð og lykt, flugvélar, þyrlur og drónar og mikið af fólki, þannig að margir hundar geta orðið stressaðir.

Ef hundar drekka vatn á svæðinu, éta snjó, eða sleikja þófa getur það haft neikvæð heilsufarsleg áhrif. Saltsýra og lágt sýrustig á yfirborði getur ert þófa og sært. Hundur með sára þófa sleikir þá gjarnan og efnin geta borist í hundinn.

Ef fólk velur, þrátt fyrir þessar aðvaranir, að taka hunda með biðjum við það sérstaklega að hafa í huga fjögur afar mikilvæg atriði fyrir öryggi hundsins og annarra:

1. Ekki láta hundana drekka úr vatnspollum, né éta snjó á svæðinu! Vatnið getur verið mengað af alls kyns skaðlegum efnum. Hafið með drykkjarvatn og skál og bjóðið hundinum eftir þörfum að drekka úr skálinni.

2. Reynið að koma í veg fyrir að hundarnir sleiki feld eða þófa fyrr en skolað hefur verið af þeim með vatni eftir að komið er af gossvæðinu.

3. Hafið hundana ávallt í taumi! Lausir hundar geta hlaupið í lægðir þar sem er gas og jafnvel á hraunið. Lausir hundar geta líka valdið öðru fólki hættu og óþægindum á leiðinni með því að koma því úr jafnvægi eða velta á það grjóti.

4. Ekki fara mjög nálægt hrauninu með hund! Hundarnir eru töluvert lægri en við og geta fengið í sig mikið meira gas. Haldið ykkur ofarlega í brekkunni með vindinn í bakið.