Mikil aukning í útgáfu byggingarleyfa

Mikil aukning var í útgáfu byggingarleyfa hjá Reykjanesbæ nú í júní og júlí miðað sömu mánuði í fyrra. Í apríl og maí dróst hún hins vegar verulega saman á milli ára en á heildina litið er virðist stefna í aukningu á ársgrundvelli. Aukningin var mikil á síðasta ári miðað við árið á undan.

Alls hafa verið gefin út 238 byggingarleyfi það sem af er þessu ári en allt árið í fyrra voru þau 486 talsins. Miklar sveiflur eru á milli mánaða hvað útgáfuna varðar, t.d. voru gefin út 76 byggingarleyfi núna í júlí en ekki nema 8 í apríl þegar þau voru fæst.

Steinþór Jónsson, formaður Umhverfis- og skipulagssráð, segir skýringuna liggja í því að útgáfan haldist í hendur við lóðaúthlutanir í nýjum hverfum. Eftir að þær hafi farið fram þurfi væntanlegir húsbyggjendur að fara í ýmiskonar undirbúningsvinnu sem taki tíma og því komi þessi uppsveifla í útgáfu byggingarleyfa nokkuð eftir á.

Steinþór segir að útlitið sé mjög gott hvað varðar áframhaldandi uppbyggingu í Reykjanesbæ, ekkert útlit sé fyrir samdrátt á byggingamarkaði hér eins og talað sé um annarsstaðar. „Við erum vel í sveit sett, það er verið að stórbæta samgöngur með tvöföldun Reykjanesbrautar og margir Reykvíkingar sá sér hag í því að setjast að hér syðra þar sem lóða- og húsnæðisverð er mikið hærra í Reykjavík“, sagði Steinþór í samtali við VF. Um 40% þeirra sem sótt hafa um lóðir í Reykjanesbæ síðustu misseri, er fólk af höfuðborgarsvæðinu.

Alls voru 76 byggingarleyfi fyrir nýjar íbúðir gefin út í júlí en í sama mánuði í fyrra voru þau 33. Í júní voru gefin út 30 leyfi, sem er gríðarleg aukning miðað við sama mánuð í fyrra þegar aðeins eitt byggingarleyfi var gefið út.

Finntán leyfi voru gefin út í maí, en í sama mánuði í fyrra voru þau heldur fleiri eða 98 talsins. Í apríl voru þau 88 en ekki nema 8 nú í ár. Eins og áður segir eru sveiflurnar miklar á milli mánuða en á ársgrundvelli stefnir í eitthvað svipað eða jafnvel meira ef svo fer fram sem horfir. Árið 2004 voru gefin út 83 byggingarleyfi en aukningin var gríðarleg á síðasta ári þegar gefin voru út 486 leyfi.