Mikið að gera í snjómokstri á Keflavíkurflugvelli
- unnið í alla nótt við hreinsun á flugbrautum og akbrautum flugvéla.
Snjóruðningsdeild Isavia hefur haft í nógu að snúast frá því í hádeginu í gær. Þá tók að snjóa nokkuð hraustlega og því voru öll tiltæk tæki sett í snjómokstur og hreinsun á flugbrautum og akleiðum flugvéla á Keflavíkurflugvelli.
Allt kapp var lagt á að halda austur/vestur-braut vallarins opinni og gekk allt flug samkvæmt áætlun.
Ljósmyndari Víkurfrétta slóst í för með snjóruðningstækjunum síðdegis í gær og þá höfðu menn ekki stoppað í fimm klukkustundir.
Næturvaktin tók við kl. 20 í gærkvöldi og hefur verið að í alla nótt við að hreinsa allar flugbrautir og akbrautir, ásamt flugvélastæðum við Flugstöð Leifs Eiríkssonar og á austursvæði Keflavíkurflugvallar, þar sem Suðurflug er með þjónustu við einkaflugvélar.
Þá eru heræfingar að hefjast á Keflavíkurflugvelli og það þýðir enn stærra svæði sem þarf að hreinsa af snjó og klaka.
Nánar verður fjallað um lífið á bakvið tjöldin á Keflavíkurflugvelli hér á vf.is á næstunni og þá vinnu sem þar fer fram til að tryggja opinn flugvöll allan sólarhringinn.
VF-myndir: Hilmar Bragi Bárðarson
Talsverður snjór safnaðist á flugbrautirnar í gær.
Tækjakostur til snjóhreinsunar af flugbrautum er allur nýr og sá besti sem völ er á.
