Mesti möguleiki fyrir Suðurnesjamenn að fá ráðherra

„Það er mesti möguleikinn fyrir Suðurnesjamenn að fá ráðherra í næstu ríkisstjórn með því að kjósa Samfylkinguna,“ sagði Oddný Harðardóttir en hún leiðir lista Samfylkingarinnar í Suðurkjördæmi og er jafnframt formaður flokksins á landsvísu.

Oddný og Ólafur Þór Ólafsson sem skipar 2. sæti listans voru á ferðinni í gær að kynna málefni flokksins og ræða við kjósendur í Reykjanesbæ. En hver eru viðbrögðin og hver eru að þeirra mati stærstu málin í kjördæminu?

„Heilbrigðismálin, húsnæðismálin og samgöngur,“ sögðu þau þegar þau litu við á skrifstofu Víkurfrétta. Oddný sagðist vissulega ekki sátt með stöðu flokksins í síðustu skoðanakönnunum en benti á að með því að styðja Samfylkinguna væru Suðurnesjamenn að auka líkur á því að flokkurinn kæmist í ríkisstjórn og þannig fá ráðherra. „Við erum ánægð með viðbrögð sem málefni okkar hafa fengið og höldum baráttunni áfram með bjartsýni að leiðarljósi,“ sagði formaðurinn.